The Tea and Coffee Plant kaffihúsið á miðri Portabello Road götunni er frekar lýsandi fyrir andann sem fylgir þessari götu. Fyrirtækið er rekið af Nýsjálendingum og gengur alfarið út á lífrænt ræktað kaffi og Fair Traid viðskipti. Starfsmennirnir eru allir frekar skrautlegir og líta frekar út fyrir að vera af götunni en kaffibarþjónar. Það er ágætis úrval af kaffi og tei og eitthvað af öðrum kaffitengdum vörum eins og mokkakönnum, sírópum og meira að segja potti til að laga grískt kaffi. Mikið af artí auglýsingum eins og gengur og gerist á svona hippalegum stöðum og einnig eitthvað af tímaritum fyrir gesti að glugga í (eru t.d. með National Geographic). Kaffihúsið sjálft er frekar kalt; ber, steinsteypt gólf, háir barstólar og því ekki hægt að segja að það sé neitt sérstaklega kósí. Manni finnst maður frekar vera á kaffistofu í verksmiðju en á kaffihúsi í miðri London. Þrátt fyrir það er mjög skemmtilegur andi þarna og starfsfólkið virðist vita eitt og annað um kaffi sem er allt of sjaldan hægt að segja með kaffihús í London. En þó er eitt atriði ekki á hreinu, góð hreinsun eftir hvert skot. Það eina sem þeir gera er að berja pökkinn úr og smella svo bara nýju kaffi í, alveg án þess að þrífa neitt meira, hvorki portafillerinn né hausinn á kaffivélinni. Það kaffi sem situr enn eftir (bæði í körfunni og kaffivélinni) fer því með í næsta bolla og getur alveg skemmt fyrir bragðinu, gert skotið mun beiskara, jafnvel funky (ímyndið ykkur táfýlusokka). Stærsti mínusinn hjá þeim er þó að þeir eru að blanda robustabaunum út í sumar kaffiblöndurnar sínar og er það ástæðan fyrir því að þeir fara ekki hærra en 3 í einkunn. Þó ég sé allur fyrir reyklaust kaffihús, Fair Traid viðskipti og lífrænt ræktað kaffi þá er notkun á robustabaunum nær ófyrirgefanlegt í mínum augum.